أريد الزواج من هذا المطلق لكن أهلي!!

ساعدوني ، انا مطلقة بعد زواج دام شهرين عندي 26 سنة و بدون اطفال جميلة جدا و محترمة و مؤدبة بشهادة جميع من حولي و ليس تشكير في نفسي ، اهلي طلقوني من طليقي علشان كان بيضربني ضرب وحشي و سبب لي كدمات عديدة بجسمي و مناطق وارمة من الضرب، كان بيخوني مع كذا واحدة و بياخد مني مرتبي ، و ده كان سبب الضرب اني منعت مرتبي عنه لما عرفت بخياناته ليا وبع ما بقيت بتضرب في اي لحظة يختلف معايا في الراي، المهم انا مشكلتي بالفراغ العاطفي الكبير بعد الانفصال ، غصب عني ببقي نفسي اسمع كلام حلو من حد يتغزل بيا زي ما هو كان بيعمل بالخطوبة، نفسي احس اني في علاقة حب مع رجل يحبني و يحترمني و يخاف عليا ولا يضربني و يؤذيني، انا بقيت بزعل اوي من نفسي لما بفرح لما بسمع معاكسة من زميل لي في العمل ،انا بصده و بعمل حدود بالتعامل بس للاسف ببقي من جوايا فرحانة و الموضوع ده مزعلني جدا و بانب نفسي كتيير علشان عارفة اني مينفعش افرح، انا مكنتش كدة بس بقيت بسبب ظروفي اللي مريت بيها محتاجة حد يسمعني كلمة حلوة ارجع اثق بيها بنفسي من تاني زي زمان قبل ما طليقي يدمرني و يدمر كل حاجة حلوة فيا. حتي للاسف اتقدملي اتنين و اترفضوا من اهلي ،واحد اعزب لم يسبق له الزواج و تم رفضه من اهلي لانه لا يناسبني في المستوي المادي و الاجتماعي و الوظيفي ، و التاني مطلق وله بنت تعيش مع طليقته بس رفضوه لانه اكبر مني ب 12 سنة و خافوا يحن لطليقته و يرجعها. انا بصراحة وافقتهم علي رفضهم للاول عندهم حق ، لكن التاني انا زعلت اوي لما رفضوه لاني شايفة ان مناسب في المستوي الاجتماعي و المادي و الوظيفي هو يعمل معي في نفس العمل ، و كمان نفس الحالة الاجتماعية بتاعتي فعمره ما هيجي يعايرني اني مطلقة وكمان انا شايفة ان الكبير شخص عاقل و رزين و عنده خبرة اكتر من الصغير يعني هو مش عجوز عنده 38 بس ، و شكله اصلا اصغر من كدة بكتيير و وسيم و محترم، انا بصراحة حسيت انه حد كويس و مناسب و مش هيتكرر تاني ، بس اهلي خاصة امي خلتني رفضته للاسف وانا مقهورة. انا بجد تعبااااانة من الفراغ العاطفي اللي انا فيه و مش عايزة اغضب ربنا و اكلم او اصاحب رجل غريب عني لاني من عائلة محافظة و ما اتربيتش علي كدة، نفسي اعيش اللي نفسي فيه بس في النور في الحلال. و شكرا.