أنتظرُ زوجاً يعوضني أيام الفقر والحرمان ولم يأتِ بعد

أنا مشكلتي بسيطة جدا ، مشكلتي إننا فقرا و ضعفاء و لا حول لينا و لا قوة ، رغم اني اتخرجت من كلية الهندسة و كنت متقبلة الوضع على أمل إن الاحوال تتغير لكن زي ما يكون اننا موعودين بالضعف و الفقر و قلة الحيلة ...لاقيت شغل بالعافية و براتب ضعيف للغاية . انا الحمد لله جميلة ..كانت الناس دايما تقولي هتتجوزي راجل كويس و شاب وسيم يعوضك عن ايام الفقر و الضعف و الحرمان ..لم يطرق بابي سوى من هم غير متعلمين فهم يروني ستر و غطا عليهم و انا من توبهم و هما من توبي .انا مش ساخطة على نصيبي ربنا يعلم بالعكس انا بحمده على نعمة الكتير .الصحة و الجمال و السمعة الطيبة لكن انا تعبت من الدنيا معنتش قادرة اعافر .نفسي اموت علشان ارتاح..مش عارفة المشكلة فين ...؟ كل يوم بروح شغلي المؤقت ده لحد ما ادور على سفر على امل تحسين الوضع.. لكن قلبي بيوجعني و بقول اني عاوزة اموت و مش قادرة اكمل حياتي .ففدت قيمة الدنيا و المشكلة ان عيلتي عاجبهم وضعهم راضيين بلا امل في التغيير فدايما شايفيني بطرانة على النعمة علشان مرضتش اتجوز السباك ولا الحداد . انا مبسخرش من حد .انا اقل من اي حد . بس انا املي اكبر من كدا. و اهلي هما سبب تعبي النفسي و ضغوطي النفسية و إكتئابي و انا مليش غيرهم و حتى لو اتغربت مش هقدر انساهم و لا ابعد .محدش بيعيش وحيد. انا مقدرش اعما كدا... نفسي حد يريحني . نسيت اقول حاجة بس مش هي الاساس ان اتقدملي زميلي كان معجب بيا .لكن مكناش على علاقة ببعض... لكن لما جه و شاف عيلتي مشى هو و عيلته من غير حتى مكالمة اعتذار .احنا فقرا.لكن انا عندي امل اني هبقى اغنى اغنياء العالم .بس نفسي ابقى قوية و قادرة اعيش لاني بموت و نفسيتي محطمة ساعدوني.