صورة علم Egypt
من مجهول
منذ 6 شهور 13 إجابات
0 0 0 0

لأني رفضت مديري في العمل أصبح يحرجني أمام زملائي

سلام عليكم حكايتي اني بنت عندي ٣٥سنة ولسة مااتجوزتش والموضوع الحمدلله مكانش مسببلي اي مشكلة لاني راضية والحمدلله ربنا كارمني شكلا وماديا فبحمد ربنا علي نعمه عليا.. المشكلة فلمدير بتاعي اللي بجد بقي سبب عقدتي وعياطي يوميا لوحدي. المدير ده اكبر مني ب١٥سنة ومتجوز ومعاه ولاد بس طول عمره بيحكي انه مش سعيد ماعلينا.. بدأ يلمح بطرق غير مباشرة انه عاوز يتجوزني بس كنت بعمل مش واخدة بالي وانفض وبعدين بقي يلمح بشكل مباشر وصديته وكسفته. يسيبني بقي؟ لا عندي زميلتي اصغر مني ب٣سنين متجوزة ومخلفة ربنا يسعدها. لو جت تشتكي من تعب ولا حاجة يفضل يقولها يابنتي انتي لسة صغيرة وشجرة مثمرة سيبي الكلام ده للي اكبر منك واتقطع ثمارهم ويفضل يبصلي بخبث وكلام من ده كتيييير. لو كان فيه حاجة ونسيتها زي اي بني ادم يفضل يقولي قدام زمايلي معلش بقي السن بيحكم. انا عارفة اني مش كبيرة بالدرجة اللي بيتكلم بيها بس كلامه بيجرح. انا عمري ما كان عندي عقده وكنت راضية بحياتي لكن بسببه بقيت كل يوم اروح واعيط بيني وبين نفسي. هو انا عشان رفضتك تجرحني وتحرجني كدة قدام نفسي وقدام الناس. بالله عليكم قولولي اتعامل معاه ازاي وايه الردود اللي اردها عليه. علي فكرة انا عدم جوازي كان سبب اني دايما كنت بقول علي ده لا وده مش مناسب لحد مابقي اللي يتقدمولي كلهم اصغر مني بكتير لان شكلي اصغر من سني وطبعا برفض او ناس متجوزين وبردو برفض. يعني استهتار بنات ودلع ودلوقتي بدفع التمن بس الحمدلله علي كل حال