صورة علم State of Palestine
من مجهول
منذ شهر 34 إجابات
0 0 0 0

أتمنى أن أسمع كلام الغزل من فم زوجي

السلام عليكم، مشكلتي مع زوجي النسونجي، صارلنا متزوجين 6 سنين و عنا ولدين . و انا كل فترة بكتشف انو بيحكي ع الفيس مع بنات اشكال ألوان، و محادثات بذيئة و مع نسوان عزابيّات و اشي متزوجات. و بنات كان يعرفهم قبل ما نتزوج، لساتو بيحكي معهم غير الصور اللي ببعتوهن لإله، صورن و هنن مشلحات ( اشي مقرف)... حاولت اكتر من مرة احكي معه بالموضوع، و يضل ينكر انو ما إله ع هيك سوالف، و يطلع علي بالصوت العالي و يحكيلي انتي معك مرض الشك ( ما بيِعرف انو عندي أدلة بتثبت كلامي ) . و دخّلت دار حماي بالموضوع، و ما عجبهم طبعا و بهدلوه و وقفو معي أنا.. بس للأسف بضل يرجع لنفس العادة. و انا كل ما اجيب سيرة وحدة عنده ع الفيس ليش ضايفها؟ و ليش بتحكي معها؟ بصير يجاوبني زميلتي بالشغل ع اساس انو ممرض، و الممرضات اللي بشوفهم كتير غير المرضى .. انا مو ضد الزمالة، بس ضد الكلام الوسخ اللي بصير بين الزملاء.. و بالآخر بصير يحكيلي روحي احكي معهم للهلبنات و شوفي شو بدهم مني ، هم اللي بحكو معي و انا ما بعبرهم، و انتي شكاكة كتير( بس أنا إلي بزوجي، هو اللازم يبطل هدول الشغلات و بنتهي الموضوع) مع انو عندي محادثات و صور لو يشوفوهم اهاليهم و أزواجهم للبنات، ليصير جرائم قتل و حالات طلاق و فضايح... و الله قلبي ما بطاوعني افضح حدا، بس انا قلبي انكسر كسر لن يجبر بسبب هالموضوع، و اخر مرة حكيتلو... اختار : يا أنا و اولادك ، يا أما البنات الوسخين !! بس سمع هيك، صار يحكيلي انتي مرتي و ما بتخلى عنك و ما ببدلك بحدا و بحبك كتير و من هاد الكلام... و طبعا بعد فترة رجع لنفس العادة... و انا حاليا محتارة ايش اعمل، لأنو خلص طفح فيي الكيل. بفكر اقعد معو اخر قعدة و احكي معو بالموضوع و افرجيه كل الأدلة اللي معي ( ما بيعرف انو عندي أدلة) ... او اني احكي مع كل بنت منهم و افرجيها كمان اثباتات من محادثاتها و صورها ( بس للتخويف، مش قصدي افضحها بين اهلها و ناسها) .. او اني اتجاهل الموضوع و كأن شيء لم يكن ( بس صعب اقدر اشوف بعيني و أتجاهل).. مع العلم انا مش مقصرة معو بأي اشي، كل شي بده اياه بصير... و ما بنقصني جمال و بنت حسب و نسب، بلبس و بتزَوَق و بتعطر، و برقصله و بعمله مساج و بحلقله لحيته ( يعني مدللته آخر دلال ) و عمل المستحيل لحتى يتزوجني.. و قفت معو بكل ديقة هو مرّ فيها. بستغرب ليش هيك بيعمل معي، فالمقابل هو مش مقصر بمصروف البيت .. بس مقصر معي عاطفيا كتيييييير.. بشتهي اسمع منه الكلمة الحلوة.. بس مع باقي البنات بصير روميو !!! ساعدوني !!