أحببت ابنة صديقي ولكن فرق العمر يخجلني

أنا رجل عمري 40 وأعز أصدقائي عمره 43، تربينا مع بعض من لما كنا صغار وبعدين هو تزوج وإجاه بنت وسميتها أنا وكنت حبها كتير واعتبرها بنتي وكنت آخدها مشاوير واشتريلها ولعّبها بالحديقة وبمدينة الملاهي وكنت وصلها على المدرسة وكانت متعلقة فيني أكتر من أبوها يعني تقريباً أنا ربيتها، وكانت هي كمان كتير تحبني ومتعلقة فيني، وبعدين أنا سافرت لما كان عمري 30 وتركتها عمرها 10 سنين ومن وقتها ما عدت شفتها وخف تواصلي كتير مع رفيقي بحكم الشغل والعمل، ومن شهر رجعت على سوريا، ورحت على بيته وفاجأته، وهو فرح فيني واستقبلني أحلا استقبال وبعدين قلي ما بدك تشوف فرح؟ قلتلو أكيد بدي شوف فروحتي حبيبة قلبي وينها؟ وأنا طبعا غاب عن بالي إنها كبرت، ولما ناداها أبوها إجت وتفاجئت فيها صارت صبية بتاخد العقل متل القمر، استغربت كتير أول ما شفتها وما صدقت انها هي البنت الصغيرة والمشكلة إني صرت اخجل اتطلع فيها وكل ما وجهتلي كلام بتلبك كتير، خاصة إن شخصيتها تغيرت كتير، ما بقت هاديك البنت الثرثارة المدللة صارت واعية وفهمانة وناضجة وكلامها موزون. بفرح كتير لما يزوروني أو زورهم لأني بحب شوفها بس بنفس الوقت بتلبك منها كل ما اجت عيني بعينها. بصراحة بخجل قول إني حبيتها، بحس عيب إني اعترف بهاد الشي، خاصة إن الكل بيفكرني بعتبرها متل بنتي. عم بتعذب كتير، بضل فكر فيها، اجيت أكتر من مرة لحتى حاكي أبوها بالموضوع بس بخاف إذا رفض اخسرو بعد ما يعرف مشاعري تجاه بنتو، وكمان هي ما بعرف إذا بتبادلني المشاعر، مرة دار حديث عن فرق العمر بالزواج فهي قالت أنا بشوف إن فرق العمر الكبير مانو سبب أبداً لفشل العلاقة الزوجية وأنا بتمنى آخد واحد أكبر مني ب20 سنة بس بشرط يكون أنيق ووسيم وجذاب وجنتل مان (حسيت الكلام موجه إلي لأن هي صفاتي) وغير مرة سألتني إذا كنت مرتبط فقلتلها لأ قالتلي اي منيح فاستغربت ليه سألتني وليه قالت اي منيح... انصحوني.