6 سنوات وهو يخونني ويتفنن في الكذب

السلام عليكم انا اتردت كتير انى ابعت بس لانى محدش بيسمعنى كويس قررت اعرض مشكلتى انا فتاه عندى ٢٨ سنة متزوجه من ٦ سنين و زوجى يكبرنى بحوالى ١٢ سنه ولما تزوجته تزوجته لانى كنت فكراه ناضج مش شاب لسه متهور كنت حابه احس إنى مسنوده على حد واعى عندى منه طفل عمره ٥ سنين وحاليا حامل بطفله تانيه..انا وجوزى عمرنا ما كنا متفاهمين اكتشفت ان انا إللى دماغى اعقل واكبر منه وأنه مش بيعرف يتصرف فأى مشكله لوحده ولازم يحكى لاهله كل حاجه فى حياته حتى لو جبنا حاجه فى البيت قصة حياتنا عندهم و دى حاجه كانت بتضايقنى وياما اتكلمت معاه انه انا شخصيا اهلى ميعرفوش حاجه عن حياتى وان دى حاجه تخصنا احنا ومفيش فايده بدأت مشاكلى معاه من اول سنه جواز لقيتوا بيكلم بنات على النت والتليفون وكل مره كنت اواجهه كان يعتذر وآخر مره ومش آخر مره واسامح وبعد فتره الاقيه بيكرر نفس الحاجه مع العلم انه بيصلى كل فرد بفرده وفى المسجد كمان صبرت كتير واستحملت خصوصا لما ابنى جيه قولت يمكن يتغير بس للأسف مفيش فايده من ٣ سنين جالوا فرصة سفر ابنى كان لسه صغير وكنت رافضه انه يسبنا بس فى الاخر هو نفذ إللى فى دماغه بحجة أن المصاريف والفلوس مش مكفيه لحد ما قولت خلاص وسبتوا يسافر من اول ما سافر وهو لا كان بيكلم غير قليل جدا ولا حتى كان بيحاول يسمع ابنه حتى لو مش عارف يتكلم لان ابنى كان صغير وقتها بس لما كان ليسمع صوت باباه كان بيشد التليفون كانه بيكلموا كان يزعق يقولى باى انا مش فاهم منه حاجه بدأت أشك أن فيه حاجه وفعلا عرفت انه فى واحده عنده بيكلمها ٢٤ ساعه كان يعرفها من زمان وكان عاوز يتجوزها المهم سكت وحصلوا مشكله فى شغله جامده مره لقيتوا بيكلمنى بيقولى انا اسف حقك عليا ده ذنبك لانى كنت هتجوز عليكى وفاهمنى انها واحده مريضه وأنه كان هيعطف عليها قولتلوا اتقى ربنا فينا انت سايبنا لوحدنا عموما اتمنى ان الحوار يكون انتهى وحلفلى انه خلاص وبرده نفس الطريقه كانت هى هى ف طلبت منه نروحلوا زياره عشان امسك حاجه بإيدى وفعلا روحتلوا ده كان عدى سنتين ولقيتوا لسه بيكلمها حتى وانا معاه انهرت وقتها وطلبت الطلاق قولتلوا عاوزه ارجع وكلم ابوه حكالوا ابوه قالوا انا مليش دعوه بمشاكلم دى اتصرف مفيش طلاق كل ده اهلى مكنوش يعرفوا حاجه وهو كان بيبوس رجلى عشان اسامح وقولى آخر مره كلعاده وانا لما شوفت ابنى بيعيط عاوز ابوه ازاى صعب عليا ابنى ف سامحت بس منستش ورجعت وعدت الأيام وحصلوا مشكله فى الشغل واتكنسل اقامته ورجع مصر ٦ شهور وبرده اكتشفت انه بيكلمها وأنه مسبهاش وساعتها عملت مشكله كبيره ومد ايده عليا وسبت البيت وروحت لاهلى وحاكتلهم إللى حصل وانى عاوزه أطلق اهلى فضلوا يهدوا فيا وعملوا قاعده وفى الاخر رجعونى ليه عشان خاطر ابنى وحرام واديلوا فرصه ورجع هو سافر تانى نفس البلد وبقيت بتابعوا من غير ما يعرف وبرده لقيتوا بيكلم بنات على النت وقلة ادب وبرده عملت مشكله وخليتوا ينزل عشان يطلقنى وبرده اهله جولى عيلته كلها الكبار وباسوا راسه وقولتلهم حرام عليكم بس لانى كنت بخاف على امى يجرالها حاجه كنت برجع لان عندها القلب والسكر والضغط وفعلا يومها قدامهم تعبت جامد خوفت تموت ف وافقت ارجع وقولتلهم رجلى على رجله وفعلا بعدها بكام شهر بعت خدنا وامى اتوفت قبل ما اسافر وحسيت بكسره رهيبه بعدها وكنت محتاجه منه انه يبقى ضهرى وسندى ويناسينى كل إللى شوفتوا منه بس للأسف هو لقيتوا غير كده محاولش حتى يعوضنى إللى شوفتوا مع انى كنت ناويه افتح صفحه جديده وسبت شغلى وحياتى فى بلدى عشان مهدمش البيت المهم كتير اتكلمت معاه انه حاول تعوضنى حاول تثبتلى انك بتحبنى فعلا يقولى يعنى اعمل ايه انتى عاوزه حب افلاطونى وانا والله كنت لما بحتاج حتى احس بحنان اروح لابنى اقولوا خدنى فى حضنك ابنى إللى عنده ٥ سنين المهم حصل الحمل ده ومكنش مترتبلوا خالص ومن يومين لقيتوا باعت رساله لواحده انه قد ايه بيحبها وانها كانت وحشاه والرساله دى راحت بالغلط لصاحبتى متجوزه وحصل مشكله مع جوزها ولما قولتلوا دى لمين قالى كانت ليكى قولتلوا كداب لان اليوم ده اصلا احنا كنا شادين مع بعض وهو عمره ما بعتلى حاجه عن طريق المكان إللى بعت منه فضل يقولى خلاص كانت لحد فى مصر وبعدين يقولى خلاص لواحده صاحبتى عادى فى الاخر قالى صراحه كانت لنفس البنت إللى كان هيتجوزها طبعا دعيت عليه وانهرت وانا حامل وتعبت جدا قولتلوا طلقنى وعمال يقولى حرام عليكى الولاد وانا كان نفسى فى بنت متحرمنيش منها بس انا فعلا مش قادره انا مش هينفع ارجع دلوقتى لان ابنى فى المدرسه لازم يخلص السنه حاولت القيلوا مدرسه احولوا عليها فى مصر مبقتش مكان وابنى ملوش ذنب ف قولت استحمل لحد ما يخلص وعلى ما يخلص هيكون ميعاد ولادتى انا بجد تعبت ومش عارفه اعمل ايه وهل قرارى غلط انا كش هقدر اعيش مع شخص بالكدب ده اكتر من كده ٦ سنين فى قرف ويخاف على المصحف كدب و دلوقتى ماسكلى فإن الرساله كانت ليا مع انه ساعتها كلمنى بعد ميعاد الرساله دى عادى ولا جابلى سيره عنها اصلا تبقى ازاى ليا يقولى كنت بغيزك وبقولك انها ليها بس مستحيل انا شيلاه كداب اوى ولو مكنتش هى يبقى لغيرها ارجوكم ساعدونى لانى تعبانه جدا واسفه على الاطاله