أصبحت أخاف من نفسي بسبب تصرفاتي التي لا تدل على شخصيتي

مشكلتى غريبة شوية و الى حد ما تخجل حتى انى خايفة افاتح حد من عيلتى عنها انا عندى اضطراب غريب ساعات بكون مبسوطة جدا من غير سبب اكيد يعنى محدش نفسه يبقى زعلان بس الموضوع ده بيبقى عندى بشكل هتسيرى يعنى بيكون عندى رجفان و برودة ف ايديا و بتكلم كتيير و بسرعة جدا وبتبقى شهيتى مفتوحة اوى زيادة عن اللزوم و ده زودلى وزنى و ممكن العكس كمان ساعات مبعرفش انام و بتكون تصرفاتى هوجاء و مبقدرش مشاعر حد قدامى لو زعلان يعنى مرة واحدة زميلتى قالتلى ف وسط الكلام انه ابوها متوفى فقولتلها احسن !!! و ده مش من طبيعتى يعنى مش بالعادة انى قليلة ذوق مع الناس و الحالة دى عادة بتستنى معايا من يومين ل تلاتة و بالعكس تماما بعد نوبة السعادة دى بيجيلى اكتئاب و هبوط و سحبة و صعوبة فى التنفس و بحس انى ماليش طاقة اعمل اى حاجة حتى انى اشرب ميه و ببقى محنية و ساكتة و مش قادرة احس بأى حاجة تجاه الحاجات الى كانت بتفرحنى و كمان استهتار فى حياتى يعنى ممكن مبصش على الطريق السريع و انا بعدى وكذا مرة عربية كانت هتخبطنى و بيبقى عندى رغبة للنوم فظيعة ممكن انام من 12 ل 14 ساعة _ مع العلم انى فى العادى مبانمش اكتر من 7 ساعات _ وبصحى تعبانة اوى و كمان ارائى و وجهات نظرى بتتغير تجاه الاشياء و الناس على حسب الاحساس بتاعى يعنى ممكن و انا مبسوطة اوى اوافق على حاجة او راى مكنتش بوافق عليه و انا عادية و بعد نوبة الاكتئاب دى بيجلى فترة لامبالاة و و برود و تبلد فترتها قليلة اوى و بعدين برجع طبيعية و بعدين تدور الدايرة تانى و على طول ف كل الحالات سواء مكتئبة او فرحانة بكلم نفسى من غير سبب لما اكون لوحدى و اتخيل موقف و وناس و اعيش معاهم و ده بيسببلى احراج شديد لو حد من اهلى دخل عليا , كمان لو حبيت ابدأ نشاط معين او حاجة جديدة مقدرش ابدا فيها و لو بدات مقدرش اكملها للاخر ,اللى مدايقنى من الموضوع ده انى وقت الاكتئاب ده اهلى بيكونو قلقانين عليا اوى و بحس انهم بيعانو معايا من غير ذنب و كمان خايفة يحصلى حاجة بسبب استهتارى على نفسى عايزة ابقى طبيعية افرح لما يكون فيه سبب و العكس, كمان و الدتى مريضة سكر و محبش تشوفنى فى الاضطراب ده اخاف يجيلها غيبوبة او لغبطة فى السكر و هيا حساسة اصلا بطبيعتها و الموضوع فعلا خارج ارادتى يعنى مش زرار لما ادوس عليه هبقى مبسوطة او العكس مع انى الحمد لله ملتزمة بالصلاة و بقرأ قران وخايفة الموضوع يتطور اكتر من كده . اسفة على الاطالة