أتمنى أن أعيش لحظات الحب والاهتمام ولكن...

السلام عليكم , شكرا على الموقع الرائع ده بجد هوا متنفسى و بلاقى عليه حل لمشاكلى , مبدئا اتمنى محدش يسئ فهمى لو لغبطت حبة فى الكلام انا بنت ف اول العشرينات فى السن اللى البنات بتتحب و ترتبط فيه بيلاقو فيه نصهم التانى انا من فترة قريبة كنت عقلانية جدا يعنى و لا كان على بالى حب و لا جواز بالمعنى الاصح كنت بنفر من الحاجات دى بسبب المشاكل اللى بقت روتين يومي بين والدى و الدتى و ياريتها كانت زى اى بيت بتعدى و خلاص لا دى كانت مستمرة و يتزيد و والدى على طول معرف الناس كلها بالمشاكل اللى كنا فيها الكلام ده ف فترة مراهقتى و المعروف انه البنات ف اوقت ده بتحتاج قرب والدها او اخوها و بتحتاج الدعم النفسى و العاطفى منه عشان متضعفش قدام اى حد و تندم بعدين ,بالنسبة لى كنت مدركة لحاجة زى كده و انه الدين بيرفض يكون ليا اصحاب ولاد و ماليش اخوات ولاد و كنت اتعامل مع قرايبى الشباب بحدود مع انى من جوايا نفسى يبقى ف حياتى راجل بجد يسمعنى ياخدنى ف حضنه يهتم بيا يطبطب عليا انا مش زنبى المشاكل اللى بين اهلى انها تمنعنى من ابسط حقوقى و لا انى اعيش سنى . ده حتى والدى لما كنت ف ثانوية عامة مكنش بيصل يطمن عليا مع انه لما كانت قريبته فى نفس سنى زمان كان كل يوم بيكلمها مكالمة دولية يسال عليها عشان كان مسافر و لما صارحته قلب الترابيزة عليا . المهم من فترة كان بيتقدملى عرسان و على عكس الطبيعى فى الوقت ده البنات بتكون فرحانة انا والدى وقتها كان بينكد عليا . ربنا كانت حكمته انه ميحصلش نصيب بس اللى كان بيألمنى انى ببقى متعشمة انى القى منهم اللى يعوضنى عن اللى والدى حرمنى منه بعد الجواز و اللى عشمنى اكتر ان الموضوع جه بعد فترة كانت صعبة جدا عليا من مرض خبيث اتعافيت منه و وفاة ابن عمى و قولت انه ربنا بيعوضنى و خلاص هفرح بعد كل اللى شوفته حتى من فرحتى و عشمى روحت قيست فستان فرح و حجزته عشان بس جالى عريس من غير م اقابله حتى !!! بس المشكلة هما اللى كانوا بيرفضونى من غير اى تصرف منى يوحى بانى رافضة و ده جرحنى جدا و كسر بخاطرى _ , يعنى انا الموضوع مكنش على بالى ابدا هما اللى جم و عشمونى بفرحة ف وقت مكنتش عارفة اضحك من كتر الحزن و الصدمات اللى كنت فيها _ بس الحمد لله , قبلها بفترة حسيت انى محتاجة ابقى ام و حاولت اعوض ده من اولاد الجيران و بحكم شغلى انى ممرضة بقسم الاطفال و الموضوع قل مع الوقت انما اللىى مقلتش احتياجى لراجل جمبى باقى الجوانب التانية اقدر اعوضها انما ده لا يعنى انا مشتركة فى نشاطات تطوعية و بحاول اشغل وقتى دايما عشان المشاعر دى متشغلنيش, وحاولت كتير مع والدى انه اقرب منه بس كل اللى بلاقيه سلبية و دايما يقلب ف مشاكلو مع والدتى و انه مكنش غلطان وانه مظلوم و الجو ده لحد م بقيت بتحاشى الكلام معاه قد م اقدر . انا كل امنياتى احتياجات طبيعية يعنى انا مثلا مش نفسى ف عربية و لا فلوس بس كل اللى بتمناه انى اسمع كلمة حلوة من راجل و محسش بعدها بالذنب لانى من حرمانى ده غصب عنى كنت بدخل فى الشات و اكلم رجالة و لكم ان تتخيلو كم الالفاظ النابية اللى بسمعها عشان اخد من وسطهم كام كلمة حلوة زى انتى جميلة و انا حبيتك يدونى ثقة ف نفسى حتى لو عارفة انه كذب و برده مرة اديت رقمى لشاب عشان نتصاحب بقى و اعوض اللى فاتنى بقا انما مقدرتش مكملتش يومين و عملتله بلوك و استغفرت ربنا كتير _ و ده قبل ما يتقدملى العرسان دى _ كمان لما كنت فى المدرسة و الجامعة كنت ببقى شاطرة فى المواد اللى اساتذتها رجالة عشان وقت ما يذيعوا الدرجات بعد الاختبار او يكرم اللى عاملين احسن بحث و لا مشروع اسمع منهم كلام تقدير و ثناء , بقيت برده لو ماشية ف مول و عديت جمب محل تخيلو وصلت لايه !! انا حتى ساعات لما بشوف فى الشارع او كافيه اى بنت و صاحبها او خطيبها او زوجها ماسك ايديها او بيقولها كلام حلو و بشوف لمعة عيونها و النور اللى ف وشها ببقى اتمنى لو كنت مكانها دقيقة واحدة ! بس و بعدين بدعيلها ف سرى انه ربنا يهنيها و متشوفش كسرة الخاطر اللى شوفتها و اسيب المكان و امشى مش عارفة اتعامل مع الجفاف و الاحتياج ده ازاى نا مبقولش انه الجواز مفيهوش مشاكل و لا فاكرة انى سندريلا بس الكلمة الطيبة و اللحظة الحلوة و الحب بيخففوا من مشاكل الحياة, حتى ساعات بحس انه مش من حقى اتحب _ ف اطار الدين طبعا _ و انه دى ترفيات بالنسبة لى . اعمل ايه ساعدونى و ادعولى بالله عليكم كتير