أبي يدخل غرفتي دون استئذان

بابا كنت وانا صغيره بحبه جدا ومتعلقه بيه لغايت لما كبرت شوية وشوفته بيتخانق مع امي كتير وبيضربها ومواقف وخناقات حصلت قدام عيني مش قادرة انساها لغايت دلوقتي بقالها اكتر من ١٠ سنين فكرهته .. دلوقتي عندي 21 سنه ومفتقده حنيته مفتقده قربه مني . دايما بيعاملني وحش انا واخواتي مع العلم انه كويس جدا مع الناس بره البيت وبيهزر وبيضحك عادي .. بابا مش قريب مني خالص ولا يعرف حاجة عن حياتي وده لانه عمره ما سألني عن حاجة في حياتي وبخاف اتكلم معاه ليضربني ويشتمني ويهني .. مش حنين خالص وبيحب يهني ويتنطط علينا ويشتمنا ولو وصلت للضرب بيضربنا قدام اي حد وبيحرجنا انا وامي واخواتي قدام اهله او اي حد غريب مش من نوع الاب اللي هو يحترم اهل بيته حتي بو بالكدب قدام الناس ع الاقل وعمره ما جابلنا حقنا من اي حد حتي من خطيبي اللي كان متمسك بيه وانا مكنتش عايزاه واتخانق معايا بسبب اني مش عايزاه وفعلا سبته وغلط في حقي وكان موقف بابا سلبي جدا !! ومش عطيني اي نوع من الحريه يعني بيتدخل في كل حاجة وبيعلق علي كل حاجة باسلوب مستفز يعني اللبس والضوافر الطويلة بيدخل اوضتي من غير استآذان مره واحدة كدة انت مش حاسه ان ده اب خالص انا بشوف ابهات صحابي حاجة تانيه خالص الطيبة والحنيه وقريبين من اولادهم لكن بابا لا خالص مفيش اكتر من انه بيصرف عليا بس وهو شيخ وملتزم ف حبسنا ومقيد حريتنا جدا وكل حاجة يقول عليها لا ! انا مش بحب قعدته في البيت ولا بحب اشوفه اصلا انا نفسياً تعبت منه وبعيط كتير بسببه .. اعمل ايه