حبيبي القديم يريد الزواج بي بعد طلاقي فهل أقبل؟

السلام عليكم ورحمة الله وبركاته، حبيبي القديم يريد الزواج بي بعد طلاقي فهل أقبل؟ أنا في عمر 16 سنة، حبيت راجل أكبر مني بـ15 سنة، بوقتها ما كنت أعرف الصح من الغلط، بس كان محترم جدًا، وحكالي: "أنا بتقدملك رسمي، ولما تعرفي إني جاي أطلبك وافقي عليّ، أنا أحبك"، وجاب لي شوكولاتة، لأني تعرفت عليه داخل البقالة

وقتها أنا كنت بحبه، بس حكيت له: "أنا بخاف أهلي يعرفوا إني تعرفت عليك، ويفكروني أمشي بطريق الغلط لا قدر الله"، بس جاب لي تلفون، وحكالي: "خليه معاكي، وحطيه صامت عطول عشان أهلك"، وكان يخاف عليّ كتير، بس نسيت أخبركم إنه كان متزوج وعنده بنتين

بوقتها مالك بطول الحكي، المهم بعدها بسنة تقريبًا جاني عريس وتزوجت، خفت أرفض لأن أهلي كانوا ممكن يضربوني، وكانوا موافقين على العريس اللي جاني، وأنا يشهد الله، من لما انخطبت، حكيت لهالشخص: "خلاص، اللي بينا خلص"، وركّزت على حياتي ومستقبلي، وتزوجت، واستمر الزواج خمس سنوات، وخلفت بنتين زي القمر، الله يحميهم من كل شر يا رب

هنا ابن عمي، خيّ البي، راح خطف أخت زوجي وتزوجوا، وربنا يعلم إني مالي علاقة فيهم لا من قريب ولا من بعيد، وعمري ما كنت أفكر إن بينهم علاقة حب ولا أي شيء من هاد القبيل، المهم، زوجي وأهل زوجي صاروا يتهموني إني أنا دبرت الموضوع، وإني أنا اللي علمت بنتهم على ولد عمي، وهنا صار في كره وعداوة بين الأهالي، وكبرت القصص، وزوجي وأهله كرهوني، وزوجي طلقني، ويشهد الله عليّ إني مالي أي دخل في موضوع أخته وابن عمي

المهم، بعد خلاف كبير، وأنا بعد ثلاث سنوات عند أهلي، زوجي تزوج وحرمني من بناتي، وسافر وخدهم معاه،أنا هنا، أختي تخبرني عن الشخص اللي كنت أحبه زمان، تحكي لي: "تعرفي فلان؟ كان بيته بنفس الشارع تبع بيت أهلك"، حكيت لها: "إي، بعرفه"، تحكي لي: "عمل حادث، هو كان بره مصر"، بس أنا ما كنت أعرف، من كتر مشاكلي وزعلي على بناتي، ما فكرت فيه وقتها

بصراحة، أختي حكيت لي إنه عمل حادث، وهو واللي كانوا معاه ماتوا، أنا زعلت وبكيت عليه، كان شخص صادق، وما شفت منه غير الخير، بعد فترة، نسمع إنه بعده عايش، بس هو في المستشفى وداخل غيبوبة

أنا هنا سويت حساب فيسبوك باسم رجل، وبعت له، طبعًا ما رد، فبعتّ لأخوه، وقدرت أحصل على رقمه، وبعد فترة قصيرة، حكيت معاه، وكان خارج المستشفى، والحمد لله كان كويس، بس والله، أنا حكيت معاه بنية إني أطمّن عليه وبس، وما كنت بعرف رد فعله، أنا فكرت إنه ما رح يجاوبني أصلًا، بس طلع لسه يحبني، ولما عرف إني انفصلت عن زوجي، عرض عليّ الزواج بدون تردد، وحكالي: "ما بدي نحكي ونضيع وقت، أنا رايدك بالحلال"

بس أنا ضميري يعذبني بسبب بناتي، وحكيت له: "إنت كمان متزوج، وأنا ما بدي أكون سبب في خراب بيتك"، وهو حكالي: "أنا ما بسوي شي حرام، ربنا سبحانه وتعالى محلّل للرجل أربعة، والحمد لله أنا مقتدر أفتح بيت تاني، وأموري المادية كويسة كتير"، بس أنا خايفة، مرتُه وبناته ما يتقبلوني، وزوجته تطلب الطلاق، وأنا ماني جاية أخرب بيتها وأخد منها زوجها، إيش أسوي الآن؟ نصحوني بس بدون تجريح