بعد أن أوقعته بحبي أهلي يرفضوا زواجنا

مرحبا انا بنت عمري ٢٨ سنة مشكلتي انه بحب شخص من زمان وعملت المستحيل لحتى خليته يحبني عشان هو كان عنده من قبل ١٠ سنين تجربه فشلت وبعدها بطل يوثق في اي انثى وكان رافض انه يرتبط او يتزوج رغم الحاح والدته واهله وكل اخوته اللي اصغر منه متزوجين وعندهم اطفال، الا انه هو اكتفى بالدراسة والشغل طول الوقت لنص الليل لحتى ما يكون عنده وقت يفكر بحدا او يتحمل مسؤولية حدا ،المهم انا قدرت اخليه يوثق في حبي وانا فعلا بحبه جدا وصار بينا علاقة وحب متبادل، هو عمره ٣٦ سنة وشخص محترم وخلوق وخجول جدا، متعلم ومن عائلة كبيرة ومعروفة بعمل الخير ومساعدة الناس ووضعه الاجتماعي ممتاز وماديا الحمدلله مرتاح مش ناقصه شي، وتكلم معي بخصوص الزواج، لكن انا امام مشكلة كبيرة وحقيقية انه هو مش اردني هو من مصر، وبيأسفني انه لسى اهالينا متمسكين بالعادات البالية وبيرفضوا يزوجوا حدا غريب، حاولت المستحيل معهم اقنعهم بالدين وانه اذا جاءكم من ترضون دينه وخلقه فزوجوه ، حاولت بالعاطفة بالحب بالعقل احكيلهم بنتحر بيحكولي موتي احسن ، بحكيلهم عمري عم بروح ومش حتزوج غيره بيحكولي ما في داعي خليكي عنا ولا تتزوجي واحد غريب مش ناقصك شي ، رافضين حتى النقاش بالموضوع، انا جد بحبه وانا اللي بدي اياه ومتأكدة اني حكون سعيدة معه، وانا مو قادرة احكيله اصلا انه اهلي رافضين يستقبلوك عشان انت مش اردني، لانه انا اللي ركضت وراه بصراحة وانا اللي خليته يتعلق فيي ويحبني ، وما بدي اصدمه او ارجعه للصفر، ولا انا بقدر اعيش بدونه ، جد مو عارفة شو اعمل ، اهلي متعصبين جدا .. وانا جد تعبت وعايشة هلا عالمهدئات .. يعني هم بدهم يدمروا حياتي وهم اساسا مش دايمين الي.. لو لا سمح الله صار لحدا فيهم اي شي انا وين بدي اروح؟ الاخوان كل واحد ماشي ورا مرته وحياته وانا اللي رح اخسر بالآخر.