مدمرة نفسياً وأشعر أنه ليس لي قيمة مهما فعلت

عارفه ان المسج طويله بس الكلام ده من احد جلسات العلاج النفسي الكتابي اللي باخذه واتمنى تحطوا نفسكو مكاني و اخد نصايح تفيدني وشكرا "في الصف الثاني الثانوي كنت مصاحبه ولد معايا في الفصل وانفصلنا في الاجازه اللي قبل الصف الثالث وكل مشاكلي بدأت من اول ما بدأ الصف الثالث لان من اول السنه وانا أصدقائي بدئو يتقربوا منه بشكل غريب مع انهم معاه في الصف من الابتدائيه وعمرهم ما كانو قريبين منه كدا ولا في سنه تانيه كانو كدا وبدئو ميراعونيش وينادوه ويتكلموا ويهزروا معاه وانا واقفه ومعاهم ولا حد منهم يعبرني ولا يعمل حساب لمشاعري مع انهم كانو أقرب ٤ بنات ليا وأصدقائي الوحيدين واحنا عشره.. انا سكتت اول شهرين وحاولت اتأقلم وحتى اتعامل معاه لما يهزروا معاه ولا كأننا في اي حاجه بس مقدرتش وكنت دايما احس انو مش قادره اعاتب حد منهم واقوله يراعيني شويه ويبعد عنه لانه حسيت انه مش من حقي اقول لحد يبعد عن حد بس لان انا عايزه كدا ولان كمان حسيت انهم قريبين مني وعارفين اد ايه الشخص دا علاقتي بيه حساسه ومن ال بديهي اني هضايق لما يعملو كدا ف مقدرتش اعاتبهم او اتكلم في الموضوع عشان كرامتي.. وانا طبيعتي مببينش اني متضايقه ف متكلمتش.. وانا فعلا اول ترم دراسه ده مكنتش بفكر في حاجه غير الموضوع دا وكنت في المدرسه بحاول امثل ان عادي و لما ينادوه يقف معانا كنت بضحك معاهم بس كنت حاسه بخنقه في رقبتي طول الوقت وكنت اول ما اخرج من باب المدرسه قلبي يدق بسرعه وكنت بعيط حتى في المواصلات لبيتي وكنت اول ما ارجع البيت اجري ع السرير بدون ولا كلمه بلبسي وأفضل اعيط لحد ما انام.. في نص اول شهر انا قلت لواحده منهم اني بتضايق وبغير لما اشوفه بيكلم بنات وكدا وهي قالتلي دا زي اخويا بس وكملت هزار عادي ولا كأني قولت حاجه.. يعني بجد اقدر اقول ان اول ترم دا كان جحيم بالنسبالي.. بعدين بدأت المرحله الثانيه وهي اني بدأت احس بعد رد فعل صحبتي لما صارحتها ان اللي بيحصل دا مقصود وأنهم بينبسطوا لما يعملوا حاجه تضايقني وان كان الفتره دي كلها بيبان اني متضايقه حتى لما امثل وكان بيبان اني ضعيفه عشان كدا كانو بيزيدو فيها ف انا كرهت نفسي وقتها وحسيت اني ضعيفه جدا وغير مقدره وسط اصحابي وكرهتهم فعلا بس مقطعتش معاهم او حاجه بس كنت لما الاقيهم واقفين معاه افتح اي حوار مع واحده منهم عشان نبعد انا وهي ومقفش معاه وحاولت أقرب من ناس تانيه وكدا بس منجحتش اوي وبدأت اهتم جدا بلبسي وكنت احوش و اشتري لبس حلو عشان اروح بيه المدرسه لاني كنت حاسه ان لو انا وهو  رجعنا لبعض كل مشاكلي هتتحل عشان كدا كنت بحاول الفت نظره واقف اهزر معاه عادي وكان في ولد كمان قرب مننا الفتره دي كنت بقصد اهزر معاه واقرب منه عشان  يغير.. الفتره دي مكنتش بعيط كتير زي قبل كدا بس كنت حاسه اني مزيفه جدا وكرهت نفسي اكتر من قبل كدا وبقا عندي جلد فظيع وبقعد افكر قبل ما انام بالساعتين والتلاته في اد اي انا مزيفه وكان في احساس كمان حساه في المرحله دي وهو اني تعبانه او مرهقه وحاسه اني بجري طول الوقت عشان ارضي دا ودا وارجع مكانتي وسط اصحابي .. فضلت كدا لحد ما نص الترم الثاني خلص وكل الأفكار والحاجات دي ف دماغي لوحدي من غير ما حد من اللي حوليا يعرف حاجه عنها و بدون اي رد فعل منه او اي تغير نحيتي... بعدها في المرحله التالته جتلي حاله من الهروب وهي اني كنت لما يبقى مش عندنا مدرس كنت اجري ع الحمام واقعد فيه اسمع اغاني لاني عارفه ان في الوقت دا هيكلموه او اقولهم مصدعه واقعد في آخر كرسي ورا اسمع اغاني ومره عملت كدا وكانت اخر حصه في اليوم ونروح البيت وحطيت السماعه في ودني وعليت الصوت على الآخر عشان مسمعهمش وكنت لسا سمعاهم بيضحكوا وبيقولو اسمه كتير بصوت عالي ومحدش سأل فيا منهم مع اني كنت قيلالهم اني عندي صداع جامد وبعدين سرحت مع الاغاني وكدا وجايه ارفع راسي من على الديسك ملقتش حد في الفصل يعني الجرس رن وكلهم نزلو ومحدش خد بالو اني نايمه في آخر الفصل.. اليوم دا أثر عليا جدا لدرجه اني لحد دلوقتي بسمع صوت ضحكهم وصوتهم وهما بيقولو اسمه وجسمي بيقشعر وبحس اني مش قادره اتنفس واقدر اقول ان هو دا الموقف اللي من ساعتها حسيت اني عندي اكتئاب .. انا مريت بمراحل كتير بس دول اهم مراحل واقدر اقول اني حاولت أصلح المشكله طول السنه دي ومقدرتش وجيت في آخر السنه وحسيت لما افتكرت كل اللي حصل اد ايه السنه دي دمرتني نفسيا و اد ايه حسيت بمشاعر بشعه اول مره احس بيها من كره للنفس وخنقه واحساس ان ملكش قيمه وسط الناس واحساس اني ضعيفه واني مزيفه وكل دا حصل جوايا من غير ما حد من أصحابي او اهلي يحسوا باي حاجه و دا خلاني اتأكد اني مش مهمه للدرجه اللي كنت فكراها عند أي حد وان السنه دي هتفضل ورايا وملهاش اي حل مهما حاولت اتأقلم او اتغير.. فاضل عشر ايام والسنه دي تخلص وبعدين ادخل الجامعه وانا ناويه ابدا حياه جديده وابعد عن كل اصدقائي القدامى بس لسا حاسه اني مش قادره اكمل بعد كل اللي حصل في السنه دي وحاسه اي تعبانه ومحتاجه راحه شوي محتاجه اتعالج من هذه السنه عشان اقدر انساها وابدا حياه جديده"