كدت اقتل ابني فتعقدت من القيادة!

انا ارملة وعندي 4 اولاد تعلمت السواقة مشان اقدر اروح بولادي واتحرك واكمل لوازم بيتي وجبت سيارة بالتقسيط المهم في تالت مشوار تقريبا كنت برجع لورا ودعست ابني.. الحمدلله ما صار عليه بس اكلت رعبة مرتبة ... من يومها مو قادرة ارجع اسوق ... وطول الوقت بحس بتانيب ضمير تجاه ابني ولو خسرته شو ممكن ححس وكيف حعيش ... ما عم انسى الحادث وبضل اتخيل لو لا سمح الله صارله اشي شو كان عملت... والمشكلة في كتير مشواير وقصص لازم اقضيها لولادي وبضطر استخدم تاكسي وبهدلة والسيارة صافة حتى ما بعتها ...نفسي ارجع اسوقها مشان ولادي بس بنفس الوقت خوفي من انه تتكرر القصة وبضل اصلا بتخيلها انها حتكرر وبحس انها اشارة .. واحيانا بقول اغير السيارة يمكن هي النحس ... شو اعمل ارجع اسوق والا لاء واذا رجعت والخوف هاد كله فيي حقدر اسوق زي العالم