هل أستمر مع خطيبي رغم تبعيته لأهله؟

السلام عليكم، هل أستمر مع خطيبي رغم تبعيته لأهله؟ دلوقتي أنا مخطوبة لواحد هو أكبر إخوته أنا عندي ٣٠ سنة وهو ٣٤ وأنا متخطبتش قبل كده والحمد لله بتقي الله في حياتي علاقتي معاه بدأت أول يوم بعد خطوبة أخوه أخدوه البلد علشان كان بقاله ٨ سنين مسافر بره البلد ورجع الساعة ١٠ بالليل وكان المفروض إنه هيسافر تاني اليوم اللي بعده ويرجع وقت الجواز يعني ده كان اليوم الوحيد اللي هيقضيه معايا في مصر

زعلت جدًا وكان رده إنه بقاله سنين مشافش قرايبه مع إنه كان قاعد قبل خطوبتي بشهرين في مصر وكان ممكن يسلم عليهم وقتها وكمان هو كان متفق معايا إننا ننزل سوا وأنا كنت مستنية أول يوم خطوبة ننزل فيه مع بعض ونتعرف على بعض أكتر

المهم هو اتعشى عندنا وسافر مع الوقت وأنا بتكلم معاه على النت عرفت إنه عامل لأخوه توكيل عام بكل شيء مقلتش حاجة كان واخد شقة تمليك وأخوه مهندس وكان هيشطبها له بس الشقة معجبتنيش فقلت له أنا موافقة نقعد في إيجار مؤقت لحد ما نلاقي حاجة كويسة قال لي وأنا كمان مش مرتاح ليها، شفت شقة تمليك كويسة وعجبته قال لي هشوف أخويا هو أدرى وهو اللي جوز إخواتي اتعصبت وقلت له ده بيتنا وحياتنا واختياراتنا قال لي ده بيزنس وأخويا بيتقي الله فينا

أنا مشكلتي إن الشقة عجبتني وعجبته وهو بيقول يارب يجعل لنا نصيب فيها والفلوس كلها مع أخوه ومع ذلك عديت الموضوع مع الوقت بدأت أحس إن كل حاجة هو بيقولها لي بيسمع فيها كلام إخوته حتى تعامله معايا يتكلم معايا أحس بصدق وإخلاص بس في الواتساب يتجاهل ويتقل عليا

هو عنده ٣ أخوات بنات و٢ صبيان أنا مش عارفة أعمل إيه هل فعلاً هيتغير ومع الوقت هيفهم ويفرق بين إني هبقى مراته وشريكته وإن لينا حياتنا الخاصة واختياراتنا وبين صلة الرحم بينه وبين أهله ولا أسيب الموضوع كله، مع العلم إنه ما شاء الله طيب ووشه حلو وجدع ومرن ومتفاهم ومتعاون جدًا

أعمل إيه، أنا دايمًا بدعي إن كان فيه خير يقربه وإن كان فيه شر يبعده، أرجوكم محتاجة نصيحة