شكل خطيبي لا يعجبني ولا استطيع أن أتركه ماذا أفعل

السلام عليكم شكل خطيبي لا يعجبني  انا في اولى جامعه ومكنش حد في دماغه ان يجي عريس ليا ومكنتش بفكر حرفيا بس فجاءه بابا قالي في عريس عاوز يتقدم بابا اصلا كان رفض عشان انا صغيره بس واحده اقنعته وقالتله عادي دي هتتخطب مش هتجوز دلوقتي انا اول ما سمعت رفضت بحكم اني لسه صغيره ومش في دماغي اصلا وبعدين شوفت صورته معجبنيش وكان سنه بالنسبالي كبير الفرق ما بينا كان 9 سنين قعدوا يقولولي فرق السن دا عادي واهم حاجه يبقى كويس وكدا فقولت ماشي هشوفه اول ما جه واتكلمنا مع بعض لقيت شخصيته كويسه جدا واحنا الاتنين تفكيرنا واحد وهو سلس واعقل مني ومتقبلني كلي على بعضي بس شكله بالنسبالي مش حلو وحرفيا مش ببالغ لو هقول كله قال أنه شكليا مقبول بس يعني اعذريني انا شكليا حلوه اوي حتى الناس كانوا بيحسبوني مش من الدوله دي اصلا فاهلي قالولي اخطبي وشوفي

بعدين انا أما كنت بقعد معاه مكنش بيبقى فيه مشكله بس اما بيمشي وبعديها بفكر في الموضوع تاني والخطوبه قربت على 3 شهور الاول كان الموضوع شكله وحبه اقول اني مش مستعده للخطوبه ومنتش عايزه دلوقتي اصلا من الأساس وحبه بقيت ابص لنفسي واللي حواليا اني وهما وحشين

انا في المده ديه بعيط وكنت بصلي واستخير وانا حاسه اني بقيت كئيبه خالص لدرجه اني وانا بفطر بعد الصيام مش ببقى قادره اكل اصلا ولا عاوزاه يتاكل وانا في المده ديه بردوا كان في حاجه في نص صدري وجعاني ومزهقاني وحبه قلبي بقى يوجعني هو دلوقتي مفيش بس انا كل ما اتكلم مع حد ابدأ اعيط ...هو المشكله ان اللي حواليا شايفين اني مكبره الموضوع خصوصا يعني أنه متكامل من كل النواحي سواء عقليه أو ماديه أو اجتماعيه وكمان هيسفرني للدوله اللي انا عيزاها وكمان أهله بيحبوني خالص ومحترم جدا يعني مكنش بينا كلام حب خالص أو تجاوزات من اي ناحيه

ماما استخارت كتير بسببي وقعدت تقولي مستخسره اني اسيبه بس انا بردوا مش عايزه أنه يزعل مني ولا أهله ولا اهلي بس انا زهقت بجد من الموضوع 3 شهور على الحاله ديه ومفيش تقدم وهو اصلا حاسس ان في حاجه وبيقولي مالك أقوله مفيش ومش هعرف اصلا افاتحه في الموضوع عشان مش عايزاه يزعل مني ممكن تشوفوني مغروره بنفسي أو اني بأفور انا بقيت معرفش اصلا اعمل ايه الموضوع مأثر على دراستي جامد والامتحانات قربت وانا مش عايزه الموضوع يأثر للدرجه ديه بس انا حرفيا زهقت بجد سواء من نفسي او من الدعاء أو من اهلي أو من اي حاجه حرفيا