هل أحتاج لطبيب نفسي بعد وفاة أبي؟

سلام اليوم بحكيكم قصة صارت معي و بعدها كيف صرت كنت في اولى ابتدائي كنت طفله متعلقة بأبوها لدرجة كنت احبه اكثر من امي .. ممكن لان امي كانت دائما برا البيت في الشغل او عند صديقاتها بس و الله كنت احب ابوي حب مو طبيعي كنت اطلع معاه كل مكان و كان يحبني و مدلعني و كان من كثر حبه لي كل ما يطلع لازم يجيب شي يفرحني فيه حتى لو بسيط ، يخاف علي حتى من الهوا ،، بالنسبة لي كان و ما زال بنظري احسن اب في الدنيا ❤❤كنت من كثر مو متعلقة فيه اول ما اصحى من النوم اطلع اجري لغرفته ادوره و اذا لقيته بعمله اجلس بالنافدة انتظره لحد ما يجي عشان وقتها اقدر اكل و اقدر العب و اقدر افرح اذا شفته لان كان معنى الحياة هو . .فجأة مادري ايش صار له . . صرت لمى ادوره ما القاه اسأل عنه يقولون في العمل اروح بالنافدة انتظره و اغفى و انا ادوره بس ما يجي ليش ؟؟!فجأة صحيت من النوم و جدتي جنبي و خالتي يبكون انا كطفله مستغربة ايش في جلست اطالع فجأة جدتي قالت قومي سلمي ع ابوكي مات قبل لا ياخدوه !!!ايوا مات نور عيني و معنى الحياة ..شفتو اللي من الصدمة واقف بمكانه ما يتحرك يستوعب الكلام هذا انا !! جاني تبلد ما عرفت من الصدمة ايش اسوي خايفة و مفجوعه و ناس كثير حولي و يبكون رحت لقيت ابوي يودعونه سلمت و انا مو مستوعبه ايش في لدرجة اصلا .. ما بكيت عليه !!مادري كيف هذيك الليله صرت اصبر امي و اخواتي رغم انو انا اول وحدة مو مصدقة ... احس ما عشت معاه احس كأني ما شفته كثير و لا شبعت منه المهم بعد موت ابوي صح ما بكيت وقت موته و لا بينت لاحد ردة فعل كتمت كل شي بقلبي بس صدق انا انهزيت ومرضت جسدياً و نفسياً و نحفت و كرهت مدرستي و انقطعت عن الدراسة لانه ما عاد بيجي يوصلني زي كل يوم كرهت صحباتي و كرهت اهلي لانهم خبو عليا مرضه و كرهت جاراتنا لانهم ما كانو يحبون ابوي رغم انه كان يقولي دائما الله يسامحهم يتكلمون فيني .. من كثر كرهي صرت انطوائية و دائما اقارن حياتي مع ابوي و بعد ما راح و دائما الوم اهلي ع تصرفاتهم اقول لو كان عايش ما كان صار هذا الشي .... اهلي الله يهديم ما اهتمو فيني وقتها و ودوني لأخصائي نفسي او شي خلوني زي ما انا ..انا دحين صار عمري ٢٠ سنه و لحد دحين ع نفس الحال .. ابغى اترك الكره و اللوم ابغى اعيش حياتي زي الناس يكون عندي صديقات ابغى اصير احب اهلي اهتم فيهم اخاف عليهم بس مو عارفه معقولة لازم دكتور نفسي ؟و اذا كان لازم كيف اقولهم ؟#حلول_حلوها