مشكلتي أني كسوله ومصابة في الخمول

انا عندى 33 سنه متزوجه عن حب من 9 سنوات ولدى طفلان 8،6 سنوات .مشكلتى انى كسوله جدا ذكيه وطموحه وعندى أفكار بس مش بنفذها بسبب كسلى وخمولى بحب ولادى لكن مش بلعب معاهم وماسكه الموبايل دايما وبطلب منهم يسيبونى لوحدى . من 6 سنين زوجى ابتدا يغير نمط حياته بعد ما اتعرف على أصدقاء جدد من نفس الحى وبقى يجى من شغله ينام ويصحى بالليل ينزل مع أصحابه واهملنى انا واولادة مش بياكل ولا بيقعد معانا ولا بقى يتكلم زى الأول اعترضت ودخلت الأهل بس معملوش حاجه وانا مقدرتش اعمل حاجه عشان والدى ووالدتي متوفين فدخلت فى اكتئاب مخرجنيش منه غير فكرة مشروع عرضته على اختى فاعملتهولى ومسكته والحمد لله بقيت ناجحه ومشروعى نجح واتغيرت شخصيتى وبقيت قويه وذكيه وبقى زوجى يحترمنى بعد مابقى ليا كيانى وخصوصا انى مش ببخل على البيت ولا على الأولاد زيه بس برضه متغيرش ولسه بينزل وعايش حياته ومهمل فينا وكل مسؤوليه البيت والأولاد عليا رغم انى حلوة وانيقه ومهتمه بنفسى فى البيت وهو بيستمتع معايا فى علاقنا الخاصه جدا . مشكلتى دلوقتى الى ارجو منكم تساعدوني فى حلها انى ابتديت اهمل فى شغلى بعد ما كبرته ونجحته وفى بيتى وفى اولادى بسبب الكسل والنوم ومش ببقى عايزة اتحرك كتير ولو خسرت شغلى هخسر كل حاجه .