أسلوب أبي أثر على شخصيتي

السلام عليكم ورحمة الله وبركاته انا فتاة عمري 17، عندي مشكلة في التعامل مع اللي حولي خصوصا أهلي، يعني انا أحب أخذ وأعطي وأضحك وأسولف لكن اللي حولي فاهميني غلط، صح شخصيتي قوية وعنيفة في الرد على الناس اللي تغلط وماأحب الظلم أو أحد يحكم علي بدون مايسمع مني، ولا أحب الناس اللي تنظر علي وهي ماتطبق اللي تقوله فما أتقبل كلامهم وأحسني مو بالعتهم وهذا يصير كثير مع أبوي | ابوي له ملف بمستشفى الأمراض النفسية ومازال يحتاج علاج لكنه يشوف نفسه أفضل من اللي حوله في كل شي وانه هو الصح، يقعد يتفلسف عليك وإنت تشوف اللي يتكلم عنه هو أول مخالف له، يعيب على الناس كثير وهو مليان عيوب إضافه انه فظ في تعامله وصعب أحد يتأقلم معه وهذا اللي حاصل مع أمي على الرغم من انها متحملته إلا إنه يجحد فضلها ويتحسب عليها ويسب أهلها| ماأقول أسلوبه ماأثر علي بلا تأثرت ويمكن العصبية خذيتها منه، حاولت أكلمه كثير وأرد عليه وأبين له إنه تصرفاته تخلينا نبعد منه، لكن للأسف مايفهمني وهو من النوع اللي يؤول الكلام على حسب شكه، وصارت سالفه انه سألني وأنا أرد عليه قام وضربني عشان ماأرد عليه لما يأمرني أو يسألني وأنا مسكينه ما أمداني أجاوب إلا هو طاقني وما أعرف كيف من وين سمع اني رديت عليه " أقوله إذا يبي شي يسويه بروحه لا يجي يكلمني" حاولت أمي تفهمه لكن اتهمها انها تدافع عني خصوصا إني كثير عفويه وقريبه مع أمي أكثر منه ، ما أنسى يوم قالي انه عاقه وينتظر اللي يتزوجني ويعطيني اياه ولا عاد يبي يشوفني، كان أول يوم اختبار لي ثانويه عامة الفصل الثاني ... مشكلتي إني ساعات ماأختار كلامي بدقه مع أمي وخواتي ، عشان كذا أنفهم غلط وأنا مو قاصدة لكن للأسف خواتي خذوا هالنقطة وصاروا يتحججون بها في كل خلاف يصير بينا وساعات ماينصفوني ويقلبوا السالفه علي، كثير يقولون لي انهم يكرهوني مو طايقيني بالرغم من اني أحاول أمسك أعصابي وأجادلهم بالحسنى، ودائما ما أساعدهم ولما يبون شي أعطيهم لكن في المقابل لما أبي منهم شي محد يساعدني لذا قررت إنهم إذا يبون مني شي لازم يعطوني مقابل، وهذا الشي أزعجهم لكن مااستفدت شي على نفس حالهم الأولي ولا بعد ينادون اني ماأساعدهم ... في عندي عيوب وأقر بها لكن مايصير الإنسان يلوم الطرف الثاني بكل شي، أريد حل لمشكلتي خصوصا إني مامعي مشاكل في التعامل مع الناس الثانية وصحباتي.