أهلي يمنعوني من العمل ومن الزواج وأبي يريدني خادمة

أعاني من مأساة لا وصف لها كانت أمنيتي أعيش عمري بعد التخرج أساعد الناس بشغلي كان عندي أهداف في حياتي واتمنيت أحققها لكن فوجئت بعد ما اتخرجت بواقع ماعرفوش وأب متحكم فيا وأم مالهاش أي حق في البيت ولا حتى انها تفرح بجوازي وأخوات فيهم السلبي وفيهم اللي بيكمل دور الوالد وانقلبت حياتي رأسا على عقب من أهداف ورؤية واضحة نفسي أوصل لها لواقع مرير خالي من كل أشكال الحياة الطبيعية بداية من مفيش شغل ولا خروج مع أصحاب ولا حتى أقارب ولا أي نوع من أنواع الترويح حتى مجرد التليفزيون أو الموبايل بالخناق نهاية لمفيش جواز ومش بس مجرد رفض دول بيحاربوني علشان أكره الجواز وأرفضه بس السؤال لما أحقق لهم ده تبقى فين الحياة أصلا اللي معدومة من كل أساسيتها وتبقى ايه أهميتها وأنا مجرد آلة بيحركوها زي ما هم عاوزين؟ العمر بيمر وانا على نفس الحال من سيء لأسوأ حاولت أستغل الظروف لصالحي وأتعلم حاجات جديدة قفلوها في وشي لغاية لما كرهت ده من كتر ما انا مابعملش باللي باتعلمه بقيت باتحسر على نفسي كل ما احاول اعرف حاجة جديدة ولو حتى عن الحياة نفسها باقنع نفسي بالواقع المؤلم ان انا اصلا مش عايشة يبقى لزومه ايه إني أحسن من نفسي انا كرهت اني أعمل أي حاجة حتى شغل البيت باعمله بالعافية باوصل لدرجة اني باقفل على نفسي بالشهر وانا عارفة اني محدش هيدور عليا مش بيفرق معاهم انا كويسة ولا لأ لأنهم اصلا دفننوني بالحياة حتى لما بنام وأتعب وأروح أكشف محدش بيسأل كل اللي يهمهم اني ما أفتكرش نفسي خالص وأنسى الخروج والشغل والناس والجواز وأشوف كل طلباتهم وبس واضطريت اني أعيش كده لغاية ما حطموني لأن انا مفيش في حياتي اي حاجة اعملها ولو ماعملتش اللي هم عاوزينه هاتهبل لأن حياتي فاضية كرهت القراءة وهواياتي اللي بتزيدني حسرة على نفسي لأني مش عارفة استغلها في اي شيء طبعا السؤال هيكون انا عندي اخوات ليه بيعملوا فيا انا كده والاجابة لأن انا الجارية الوحيدة اللي في البيت والباقيين ولاد عايشين حياتهم ومتجوزين وباخدمهم وبيتحكموا فيا تلبية لرغبة السيد الوالد وطبعا السؤال التاني انا ليه ما أخدتش موقف بالطبع انا أخدت مواقف كتير لكنها باءت بالفشل وآخرها لما صممت على الجواز كل مرة يعملوا فيا نفس المقلب او بمعنى أصح كل مرة باخد نفس الألم وبيوقفوا الموضوع حتى لو يوم الخطوبة وماعندهمش اي مشكلة انهم يمنعوا اي جوازة حتى يوم الفرح ومش بس الموضوع بيقف كده عادي لا ده بتحصل خناقات كبيرة من ورا الخيال والنكتة اللي تقهر ان انا كل ما باتعب او يحصل لي اي حاجة من اللي بيعملوه فيا يقولوا ان ربنا بيخلص مني علشان مش باسمع كلامهم وبيوصل الأمر لأنهم بيتهموني بالكفر وأعتقد ان ده طبيعي لأنهم عارفين ان اللي بيعملوه فيا يوصل للكفر طبعا حاجة ولا في الاحلام بس بكل اسف دي حقيقة مرة انا رحت لدكاترة نفسيين مفيش حد عرف يعمل لي اي حاجة الكل معتمد على مضادات الاكتئاب والمهدئات والمنومات اللي مابقتش بتجيب اي نتيجة معايا ولا حتى بجرعات زيادة واضطريت اني أبطلها لأنها بقت معدومة الفايدة أرجوكم حد يقول لي حل واقعي ومنطقي أقدر أنفذه على أرض الواقع يعني بلاش حلول اني أسيب البيت واتجوز غصب عنه لان انا بالفعل حاولت اعمل كده ومانفعش ومحاولات كتير بالسياسة والإقناع والدين وتدخل الناس ولكن كله كله بلا جدوى انا خايفة على نفسي اوي مابقتش مستحملة حياتي اللي كلها لهم ومفيش فيها اي حاجة ليا الايام كلها شبه بعضها لدرجة اني بانسى اليوم ايه نفسي في يوم جديد مختلف أعيشه لنفسي انا كل يوم بانتظر الموت مع اني خايفة منه ومش عارفة أعمل له ودي مشكلة تانية تعباني أوي لكن بقى هو ده الحاجة اللي انا عايشة منتظراها في كل لحظة أرجوكم ساعدوني بحل مقنع وسهل انا مابقتش قادرة أستحمل أعيش كده ومفيش اي بادرة أمل من اي نوع حتى الدكاترة والناس مفيش حد عارف يساعدني حتى الدوا مفعوله انتهى ولو أمكن ذكر اسم دوا فعال يخلليني أنام لأن انا باتعذب في نومي بس ياريت حاجة ماتسببش تعود لأنها بتيجي معايا بالعكس ومفعولها بيبطل