كيف أوازن بين حبي للجامعة وبين أهلي وعلاقتي معهم؟

السلام عليكم انا مشكلتي اني ما بلاقي وقت اقعد مع اهلي ونوعا ما حاسة في حاجز، وإذا ضحّكت حد فيهم بحس بإنجاز حاليا.. أنا بدرس بالجامعة ووقتي كله دراسة أو شغل ومتابعات أو بروح متأخر وبنام من التعب أو من الملل و الخوف مرات من حياتي برا بضل قاعدة عالتلفون .. من لما دخلت الجامعة وحياتي للأحسن فيها ومبسوطة فيها بعلاقاتي وأهدافي الي بحققها.. بس برا انا مو مبسوطة بعلاقاتي وحتى أقرب الناس الي اهلي مو عارفة ارجع زي اول معهم.. بالذات ماما، كنت زمان احكيلها كل اشي.. هلأ يا دوب بشوفها ، حاسة بحاجز بيني وبينها حتى بمنعني احضنها أو بحس بتكلف وصعوبة لما اجي افتح اي موضوع أو احكيلها كلمة حلوة.. وعندي كابوس وتفكير دائم انه يصير اشي للناس الي بحبها يخليني اندم عكل وقت ضيعته بعيد عنهم.. انا هاد الوضع مو عاجبني ولا مريحني.. ما بدي تحكولي شو الحل وبس، بدي حد يحكيلي كيف ابدا ومن أي خطوة.. كيف اوازن بين حبي للجامعة واحلامي الي بحققها فيها وبين اهلي وعلاقتي معهم؟ شكرًا مسبقًا